Витаминот Б1 спаѓа во комплексот на Б витамини кои се растворливи во вода. Неговата најважна улога е одржување на здрав нервен и кардиоваскуларен систем. Покрај тоа, Витаминот Б1 е неопходен за одржување на мускулниот тонус и здравјето на очите, кожата, косата и црниот дроб. Му помага на телото полесно да се справи со стресот, па често се нарекува и „антистрес“ витамин.

Не се складира во телото и затоа е потребно секојдневно да се внесува со храната. Најдобри извори на витамин Б1 се: интегралните житарици и месото, особено црниот дроб. Исто така го има во пченичните ‘ркулци, интегралниот ориз и секако во овошјето и зеленчукот: спанаќ, печурки, зелена салата, аспарагус, грашок, сончогледово семе и домати.

Недостатокот на витамин Б1 може да предизвика различни симптоми, вклучувајќи летаргија, иритабилност, слаба меморија, недостаток на апетит и здрав сон, лошо варење н ахраната и пречувствителност на слузокожата. Доколку симптомите не се третираат и не се надокнади недостатокот од овој витамин, се јавува хиповитаминоза која резултира со болеста бери бери. Последица на оваа болест се изразени абнормалности на нервниот систем и срцето.

Витаминот Б1 е неопходен и корисен од повеќе аспекти на човековото здравје:

• Помага во правилен развој на обвивките на нервите и го спречува нивното уништување и изумирање.
• Помага во создавање на неуротрансмитерот ацетилхолин, кој е неопходен за правилна работа на срцето.
• Одржувајќи го здравјето на нервниот систем, го намалува ризикот од појава на депресија.
• Витаминот Б1 во комбинација со други нутритиенти ја спречува појавата на катаракта (старечко перде).
• Има моќно антиоксидантно дејство и ги редуцира ефектите од стареењето.
• Го подобрува лачењето на желудочната киселина и правилното варење и апсорпција, на хранливите состојки.
• Ја спречува појавата на Алцхајмеровата болест и го забавува нејзиниот прогрес.
• Ги подобрува памтењето и концентрацијата и го одржува менталното здравје.
• Ја подобрува способноста за учење.
• Го помага создавањето на црвено крвни зрнца.
• Го подобрува апетитот.
• Неговото надокнадување е особено важно за лица кои страдаат од алкохолизам и цироза, за да се спречи појавата на кардиомиопатија (заболување на срцето).

Во најголемиот број земји, дневно препорачана доза за витаминот Б1 е 1,5 мг. Најновите испитувања покажуваат дека кај лица кои земале 50 милиграми дневно од овој витамин, забележана е зголемена ментална активност.